Чиксез күктән су астына кадәр. Актив ял яратучыларга Татарстанда нишләргә?

Башлап җибәрүче экстремаллар өчен

Актив ялның иң гади төрләренең берсе – бау паркында йөрү. Казанда алар өчәү – Горкий-Әмәт урманында, Fun 24 күңел ачу комплексында һәм Горький паркында. Аларның һәрберсендә сезгә иминлек (страховка) системасын бирерләр, инструктаж үткәрерләр һәм маршрутны үткәндә юл күрсәтерләр. Монда канатлардан өч тәгәрмәчле велосипедта йөреп, үзеңне цирк артисты итеп тоярга һәм, «Форт Боярд» уенчылары кебек, селкенә торган баудан ясалган баскычлар һәм пират ятьмәләре буйлап үтәргә мөмкин.

Кояш белән суга гашыйклар өчен

Вейкбординг

үзенә су чаңгысы слаломы, акробатика һәм сикерү элементларын туплаган экстремаль спорт төре.

Вейкбординг – җәй көне сафлану, хәл җыю өчен менә дигән ысул. Казанның Аккош күлендәге ProVoda вейк-паркында, барлык кирәкле инвентарьны прокатка алып, үзеңне 10 минутлык кыска сетларда сынап карарга мөмкин. Әгәр дә сез тәҗрибәле вейк-бордчы икәнсез, тулаем бер көнгә абонемент алу мөмкинлеге бар. Шулай ук монда интенсивлар да үткәрелә: төрле дәрәҗә укучылар өчен өч көн теоретик һәм гамәли дәресләр үткәрелә.

Әлмәтнең шәһәр пляжыннан ерак түгел урнашкан тагын бер вейк-парк иң заманча техника белән җиһазландырылган, шуңа күрә монда кышын да тактада йөртәләр, ә бу исә гади сноубордтан күпкә экстремальлерәк.

Барысын берьюлы алырга теләүчеләр өчен

«Свияжские холмы» – ел әйләнәсе эшли торган курорт-шәһәр. Ул Зөя утрау шәһәренә һәм искиткеч матур нарат-чыршы урманына карап тора. Бу курорт-шәһәр Югары Ослан районында Зөя елгасыннан ерак түгел урнашкан. Кыш көне монда тау чаңгысы белән сноубордта йөриләр, ә җәй көне гольф уйныйлар. Монда ук бөтен җиһазларны прокатка бирәләр, ярдәмгә килергә ашыккан инструкторлар да бар. Балаларга да монда күңелле булачак: алар өчен тюбинглар һәм балалар бүлмәсе каралган. «Свияжские холмы» — озын ялларны үткәрү өчен бик әйбәт урын. Курорт-шәһәрдә төрле дәрәҗәдәге номерлы кунакханәләр, җыйнак кына альп йортлары, рестораннар, кафелар һәм велнес-үзәк бар.

Хайваннар яратучылар өчен

Казан ипподромында атта йөрү буенча бер тапкырлы дәрес алырга да, мәктәптә укып чыгарга да мөмкин. Атта бер генә тапкыр йөреп караган кеше дә аларның матур ялларына һәм грацияле адымнарына гашыйк була. Майдан октябрьгә кадәр ипподромда ат чабышларын, ә ел әйләнәсендә һәр җомга саен сәгать 13:00 дә арбалы ат чабышларын карарга мөмкин.

Болардан тыш Казан ипподромы территориясендә «Батырхан» республика көрәш клубы, «Энигма» футбол манежы һәм «Чыңгызхан» спорт клубы эшли. Соңгысы уенчыларга пейнтбол уйнау өчен өч мәйданчык тәкъдим итә: икесе – стандарт, өреп кабартыла торган ышык урыннар белән тәэмин ителгән, ә берсендә агач йортлар, дотлар (озак вакытлы саклану нокталары) һәм чын автомобильләр бар.

Батыр йөрәклеләр өчен

Шәһәр урамнарында адреналин алу өчен зур тизлектә йөрү тыела. Аның каравы KazanRing автодромында узышлар трассасын махсус трек-көннәрдә үзеңнең яисә «җирле» машинада сынап карарга мөмкин. Автодромда үткәрелә торган чаралар исемлегендә картинг, төрле дәрәҗәдәге авто- һәм мотоузышлар буенча чемпионатлар һәм внедорожниклар катнашындагы тамашалы ярышлар бар. Автодромда профессионаллар гына түгел, башлап җибәрүче шумахерлар да үз көчләрен сыный ала.

Гап-гади романтиклар өчен

Татарстан күген парашютта яисә очкычта яулап аласың килсә, республиканың Үзәк аэроклубына рәхим ит. Ул Казаннан 35 һәм 100 км ераклыктагы ике аэродромга – «Куркачи» һәм «Балтач» аэродромнарына нигезләнгән.

«Куркачи» аэродромында Як-52 самолётында очарга һәм 900 метр биеклектән мөстәкыйль рәвештә яисә профессиональ инструктор белән бергә сикерергә мөмкин. Тотрыксыз, ирекле төшү вакытында барлыкка килгән хис-кичерешләр парашют белән кабат сикереп карау теләге уята, диләр. «Балтач» аэродромында исә планерда очып карарга мөмкин. Аэродромнарның икесендә дә кунакханәләрдә туктарга һәм пикник ясарга мөмкин.

Салкын канлылар өчен

Кемдер күк биеклеген, кемдер су төбен якын итә. Казаннан ерак урнашмаган искиткеч матур җирдә – Зәңгәр күлдә су төбенә төшеп карарга мөмкин. 18 метр тирәнлеге һәм кыш көне дә бозга әверелми торган суы бу күлне экстремаль спорт белән шөгыльләнү урынына әверелдергән. Күлгә җәй көне дә керергә бик җиңел түгел, чөнки бу ел фасылында да су температурасы 3–7 градус хасил итә.

Дайвинг өчен махсус гидрокостюмның һәм инструкторның булуы кирәк. Ә коенырга теләүчеләр монда теләсә кайсы вакытта килә ала.

Маршрутлар

Туристлар арасында популяр

Казанга кадәр билет бәяләрен белегез